藏 (已結業)

餐厅喺铜锣湾，系高级日本料理餐厅。Lunch Set非常高质，包括沙律、茶碗蒸蛋、味噌汁同甜品。沙律菜好新鲜，鲜甜番茄，再落麻酱，最特别系上面有炸京葱，味道似炸蒜但冇咁重味。味道更丰富又唔会影响沙律嘅清新感觉。茶碗蒸蛋上面铺满蟹肉丝，令到蒸蛋有淡淡蟹味。蒸蛋本身劲滑又充满蛋香，比起平时食𠮶啲更高层次。味噌汤就味道适中，最紧要系热辣辣，饮完全身暖笠笠。【极み刺身7种$340】用一只有花纹嘅透明玻璃碟装住，好鬼靓。七款刺身每款有两片，师傅有心思，有啲刺身加咗唔同嘅调味料，味道更多变化。甜虾鲜甜带胶质，配咗黑松露，味道又几夹。𫚕鱼就鱼味浓，配柚子酱酸酸甜甜，加添清香感。䲞鱼好滑身，配少少辣萝卜，刺激吓。火炙银鳕鱼刺身就第一次食，有少少焦香味。鱼油丰富，正。最好嘅要留到最后。拖罗好厚切，粉嫩色鱼肉满布脂肪，鱼味油味浓郁，不得了。【日本云丹アメリカ伊势海老丼$480】一上枱，先系震撼，然后兴奋。成只龙虾已拆肉，仲有一排海胆。海胆完全冇腥味，鲜甜十足。龙虾肉雪白，爽口鲜美。下面嘅饭有蟹柳、菇片、甜蛋同紫菜。超满足，坐喺旁边嘅食客都系食紧呢个，真系「大人气」。甜品系日本传统嘅红豆蕨饼，口感软滑柔韧。