寿司部

营业中

休息中

心血来潮想食寿司，见到呢间寿司部价钱大众化，而且都有唔少街坊帮衬，就入去买咗D寿司返屋企食！虽然食物价钱比起任何连锁餐厅更便宜，但是食物好有质素，性价比好高！点咗一个寿司拼盘，19件寿司即点即握先$148，计返每件先$7.7，仲要寿司唔系玉子或者腐皮寿司之类，净系花之恋寿司都有三大件！价钱真系平到好夸张！ 寿司拼盘有三文鱼6件，花之恋3件，鲜带子3件，玻璃虾3件，鳗鱼2件，马刀贝2件，一向钟意食三文鱼，呢度嘅三文鱼色泽新鲜，选用近腩位部份，非常肥美！每件花之恋更加有三大片厚切三文鱼包裹，加上慷慨嘅蟹子，实在满足！带子柔软鲜嫩，口感无变硬，明显新鲜。马刀贝口感爽脆，一样深得我心！玻璃虾质感相当不错，爽口弹牙，轻轻咀嚼时可以食到虾肉鲜味，新鲜度甚高。我哋仲点咗美国珍珠蚝，原先谂住点两只试下，点知店员非常公道，竟然话因为蚝开出来比较细，所以额外送多一只俾我哋！非常开心！虽然蚝唔算好大只，但鲜味十足，仍然保留海水味，口感creamy爽滑，我哋都后悔点得太少！雪柜仲有三文鱼骨卖，买咗一包煲汤。$20一大包，价钱好抵，而且好多肉，自己起完鱼鳞煎一煎香，加埋番茄薯仔咁就系一煲健康又美味嘅三文鱼汤！