早安越南 (已結業)

记起对上一次真系食越南野已经系上年十月系深井食了。啱啱好睇完金刚就越南风情画上身，直接系隔离解下瘾。入到去其实觉得佢似间西餐厅多啲，霓虹灯管同墙壁上嘅酒瓶组合起黎似西式风格。但枱面一样有辣椒酱同食捞面用嘅酸辣汁，好一个Mix&Match。第一主食拣左生牛肉汤河，牛肉汤好够味，唔系死咸死咸的，加上又够热，令切得薄嘅牛肉浸系热汤中好快熟。而且牛肉浸耐左都无过老，仲保持到嫩口。唔错唔错。只系河粉少左啲作为晚餐未够饱。而第二主食系马拉盏海鲜炒饭。个炒饭非常足料，配料虽然同其他餐厅嘅差不多，青口鱿鱼虾等，但入面用左三大只开边鲜虾，而且啲饭炒得够干身，所以食落唔油口。我地为左过下口瘾，所以点左炸虾饼。本来无咩特别，但咬落去先发觉好结实外皮炸得好香口，虾味又足，以为平平无奇嘅一口出奇地好食。尤其系点埋个酸辣酱，中和油分之余亦虾饼食落无咁单调。睇完越南戏，食埋越南饭，做左一晚越南人，哈哈。