越南牛肉粉專門店 (已結業)

去咗越南牛肉粉专门店买外卖返去食，买咗个招牌套餐，包一客越式粉面、小食同特饮。香茅猪颈肉捞檬入面嘅猪颈肉爽脆香口，松化得嚟仲有少少肉汁。下层檬粉铺咗啲切丝青瓜、胡萝卜、葱花、炸干葱同花生碎，加埋鱼露一齐食都几清新惹味。小食方面原本想食米纸卷，可惜啱啱好卖晒，于是改要炸春卷，细细件咁外皮微脆但又有啲烟韧口感，调味比较浓但可以接受。朋友就叫咗火车头套餐，包一杯饮品。火车头汤河入面有生牛肉、牛筋、牛丸同熟牛肉。汤河跟埋包调味料，分别有芽菜、九层塔、青柠同辣椒片，加埋入去个火车头度一齐食都唔错。我食咗少少牛丸同牛筋，前者弹牙后者爽口味道唔错。仲饮咗少少个汤，非常香浓兼有牛味，不过无口干嘅感觉，我觉得比捞檬更出色。饮品就拣咗热越南莲花茶，莲花即系荷花，饮落几有荷叶香都几消滞。另外红毛丹冰入面有四粒酿咗罐头菠萝肉嘅原粒红毛丹，味道就甜咗啲。