ZENWICH (已結業)

系朋友介绍之下，去左呢间木系装修好隐世嘅cafe到试吓个排包三文治。餐厅内部有啲三尖八角，门口入口处有面落地大玻璃仲有啲绿色植物，拣左坐果边嘅云石矮枱木梳化，望出去嘅景有楼遮挡，真系唔吸引，但胜在马路较阔同有少少天空，都叫做开扬，可以晒太阳放空一下。-汤无记错系南瓜姜汤，姜味唔会太过分，淡淡地，成个汤同卖相一样咁顺滑，唔错，只系略嫌唔够热。-我拣左全份嘅蟹肉牛油果三文治，排包烘过，卖相好吸引，除左入面夹左好多蟹肉之外，面头有大大粒牛油果同蟹子。用佢底下铺垫嘅纸就可以好轻易拎起成个包。我口唔够大，仲唔觉意整跌左粒牛油果，食前建议塞晒啲牛油果入包入面先咬。排包甜味夹住好丰富嘅配料，蟹肉伴左少少酱，有啲水份又唔会好重口味，整体感觉好Fresh，不过牛油果略生，但可接受。最开心系，食到最后都依然有料。-另外叫嘅系全份明太子玉子烧三文治，不得不说玉子烧嘅厚度媲美排包，同埋望到卷蛋嘅层次感好吸引，蛋味连同咸香丰富，仲食到鲣鱼碎添。只系相比蟹肉牛油果嘅果种清新，明太子玉子烧就会比较「漏」，半份都已经足够。-另外一提，店舖当日负责嘅员工突然点起香枝，空间有限底下，香味明显太重太浓，似供神佛多过似食店。