澳門台山水佬榮火鍋專家 (已結業)

得知水佬荣喺香港开分店, 我同史生都未试过澳门水佬荣, 所以决定试吓.星期日我喺佐敦番学, 史生订定8点钟位, 我一放学就九秒九跑去水佬荣, 3至5楼都系水佬荣o既, 我估5楼系VIP房, 我哋就坐4楼.因为我唔系特别钟意食蟹, 所以叫咗个花蛤煲小辣, 个煲好多料, 除咗有好多花蛤之外, 仲有好多杂菌、芫茜、葱同西芹等, 好丰富, 个汤底好浓郁, 辣味来自胡椒, 我同史生都觉得如果唔要辣个汤会更加清甜. 侍应提我哋要先食花蛤先, 因为花蛤滚太耐会老, 所以我哋不停口咁食, 花蛤数量都几多, 但我本人较钟意食花蛤皇, 所以觉得呢度o既花蛤唔够大只, 但胜在够新鲜.食晒花蛤之后, 就开始打边炉啦! 叫咗我最爱贵花蚌, 好厚肉而且唔会梅, 好鲜甜好好味呀! 金菇都好新鲜, 不过份量少啲, 预咗啦! 莴荀都好新鲜, 厚度适中, 灼大概3分钟就又爽又脆, 好味! 我冇食鱼蛋, 因为呢样系史生最爱, 我冇问佢好唔好味, 但睇个样都几弹牙o既!最后有一盘西洋菜, 新鲜而且唔会太粗所以唔会老, 灼完索晒啲汤真系好好味呀!呢度有露台, 可以行出去呼吸一下新鲜空气, 望住佐敦道车来人往, 真系几写意架!