Bentley's Cafe (已結業)

位于观塘Bentley showroom旁嘅cafe，同样属其集团经营；明明只有两枱客人，但一入门店员就问有无订座，后尾先偷听到有啲座位要预留起，可能留俾买车客🧐？Set Lunch价钱$122-162，六款选择，不外乎海陆空扒餐、Pasta同Risotto；沙律餐汤二选一，配一杯餐饮。沙律不过不失，谈唔上新鲜，感觉系雪藏菜；紫洋葱比例占半，怕洋葱味嘅人较难接受。指明三成熟，上枱七成，差距甚远；牛扒质素唔合格，无牛味，肉韧难切，多筋，幸亏烧汁调得几惹味，拉返少少分。以薯蓉及煎煮茄菜作伴碟，前者留有薯粒，比较有咬口，不同坊间混和大量牛油嘅软滑口感；茄瓜、西兰花、甘荀煎得油身偏焦。成个餐最好应该系杯茶，因为用现成茶包冲成😂薄荷味浓，回甘，食完肉类饮几解腻。每样野一食完店员就赶住收碟，嘢饮未饮哂已经催卖单，呢个价钱呢个服务，真系只此一次。