胡爐 (已結業)

尖沙咀行街谂唔到食乜？唔使讲嘢，一定系去厚福街！𠮶度真系劲多选择，台式、中式、日式乜都有。今次我哋拣咗一间上楼嘅打边炉，二百几蚊任食，系尖沙咀呢个价钱真系唔贵，加多$38仲有嘢饮任饮，啤酒、汽水、道地樽装茶。煲底方面我哋拣咗鸡煲，用料充足，又麻又辣，多芫茜，正到爆！只鸡又够大只，肉质鲜嫩。海鲜拼盘你哋睇相都知佢咩料，鲍鱼、扇贝、蚝都非常新鲜，又唔会有沙。去到个胡炉拼盘，牛舌心鲜甜爽口，仲有澳洲和牛，系我近期食过最高质素嘅肉食。跟餐仲有手工丸饺拼盘，平时我对肉丸同饺类都唔系太大兴趣，但系佢个泰王鲜虾云吞真系好正，虾够大只，虾同肉比例出色，仲食到九层塔既香味，有惊喜！黑松露墨鱼丸同埋芝心牛丸都非常出色，爽口弹牙。𠮶晚仲识咗佢哋嘅老板娘同经理，佢哋都非常热情好客，亲力亲为，其他员工都劲好礼貌，好快会再去帮衬！