星巴克咖啡 (已結業)

其实间间starbucks嘅食物同咖啡质素都差唔多，话晒都系大型连锁咖啡店，总有一定嘅QC。所以我觉得去starbucks都系环境同气氛最紧要。咁多间starbucks，我比较喜欢文化中心同LCX呢两间，文化中心𠮶间比较大，有多d大沙发，而且唔系好多人(特别系夜晚)，感觉好舒服。至于LCX呢间，唔驶多讲，梗系食个景啦！面向一望无际嘅大海景，叹住一杯香浓嘅咖啡，听住轻松柔扬嘅音乐，所有烦恼自然都抛诸脑后。所以辛苦工作后，都希望嚟唞下，叉下电。试过有一次，放工后嚟叹下，一坐就坐到八点，望出窗外，隐约见到远处有火光，再望真d，原来系烟花。当日好好天(唔似近日咁大雾)，我谂可能系望到迪士尼嘅烟花，真系可遇不可求，心情轻松d，睇到嘅嘢都靓d。呢个话晒都系「食」评，点可以唔讲下食呢！原来starbucks嘅芝士多士好好架！从来喺个柜入面都唔起眼，点都唔会拣中佢，不过有一次夜咗d，个柜差唔多「吉」晒，剩返一两件芝士多士，好啦！就试下啦！店员帮我焗返热，热辣辣真系唔同d，多士依然香脆，芝士好香，值得一试。