TATA KSR 韓式。燒烤 (已結業)

放工去苏屋邨探索之前，经过附近嘅斜坡，发现咗一间有得饮烧酒嘅韩式小店，所以入咗去同个frd医一医肚。一入去见到有IU poster同播紧鱿鱼游戏，成间舖都充满住韩国文化～侍应厨师们都好nice，推荐我哋嗌佢哋新自家出品嘅年糕奶茶，我一听到个名打晒黑人问号，不过以猎奇心态就嗌咗杯无糖年糕奶茶，可能系因为无糖关系，个茶底有啲淡，奶味比较多，茶味比较淡但入面有细粒圆桶形嘅年糕，都几烟韧，可能下次嗌返少糖就会好饮啲。讲返正食，我哋一行两人嗌咗个两人份量嘅部队锅。个底系公仔面，汤底系泡菜汤底加芝士，值得一赞嘅系浸芝士味好浓郁，愈煲愈浓味，愈食愈邪恶，食到最尾变咗泡菜芝士汁，very good！锅入面仲有翠肉瓜、午餐肉、圆扁型年糕，同埋我最爱之一嘅金菇！面底都几多，两个人食都好饱，但要小心啲面好快发胀，所以我哋喺啲面发胀之前就拎晒出嚟放咗喺个碗到，都未至于去到一胀不可收拾嘅地步。前菜有牛骨汤同泡菜，值得一提嘅系牛骨汤入面嘅牛丸好弹牙，同埋汤底应该冇咩点落味精，淡淡哋几好饮。