陶源酒家 (已結業)

姐夫家姐请饮茶，不过疫症下外出饮食亦要格外小心，今次姐夫选择嘅中菜馆真系令我食得安心，唔止环境阔落，枱同枱嘅距离够大，而且食用餐具会浸喺100度热水里面，客人嚟到先设置，确保干净。职员带我哋去到落地玻璃前嘅餐枱，窗外嘅海景真系令人感觉舒适，可惜今日嘅雨又雾遮挡咗一半。食物方面味道唔错又足料，卖相精美，而且笼笼都出紧大烟，好新鲜。服务方面职员有礼有笑容，而且午巿正价食品有8折，环境服务品质嚟讲性价比几高。笋尖原只鲜虾饺，粒粒都饱满，虾肉爽口，皮唔厚，夹起亦无烂，唔错。沙巴鲜虾烧卖皇，大大粒，涨卜卜，几好。不见天韮皇鲜虾肠粉，每件肠粉都有粒大虾仁，肠粉几滑。香滑马蹄牛肉肠粉，呢个我觉得牛肉太淋，味有啲怪。凤梨咸水角，好可爱嘅造型，咬落去又热又软糯。芋丝脆春卷，新鲜炸起，好香脆。豉蒜蒸新鲜排骨，排骨新鲜肥瘦适中，入口有少少油润感，好味。酱皇豉蒜蒸凤爪，凤爪够入味。高汤花胶瑶柱灌汤饺，有块胶同蟹柳喺面好养眼。椒盐鸡软骨，炸得几好，够脆，又唔会太干太硬，好味。海蜇熏蹄，熏蹄够厚，味道可以无特别。养颜红枣糕，唔黐牙唔会太甜，唔会有胶嘅口感。招牌奶皇千层糕，好松软，有奶皇味及蛋香味。