隨然有機玄米菜食料理 (已結業)

而家放假已经唔系行山做运动，每次都只系想揾间环境舒适、可以hea好耐既餐厅休息下，呢间素菜餐厅都几适合。叫左两个套餐，分别系阴阳平衡套餐-和食同洋食。阴阳平衡套餐-和食 ($138)前菜有萝卜蓉味噌汤、冷豆腐同埋羽衣甘蓝野菜沙律。羽衣甘蓝独有既甘苦味，配上黑醋汁酸酸地开胃。主菜系豆腐主食。豆腐微微炸过令外皮皱起，咬落软滑，豆香味浓。配上糙米饭，有丰富维他命B，更加健康。阴阳平衡套餐-洋食 ($138)前菜同样有萝卜蓉味噌汤同埋羽衣甘蓝野菜沙律，冷豆腐换上焗南瓜红菜头藜麦。藜麦系岀名既super food，食完唔知可唔可以阴阳平衡，但肯定既系营养价值高味道有淡淡红菜头香味。主菜系味噌野菌长通粉。估唔到日式既味噌汤底煮成汁，配上意式既长通粉，又岀奇地好食 长通粉软硬度适中，略带咬口。最后加上一杯豆浆咖啡，慢慢欣赏自然光渗入既环境。