柳氏家 (已結業)

自从柳氏家喺香港开铺之后一直好想试下，不过见佢啲分店好似越嚟越少，宜家得翻荃湾有，所以趁放假得闲就专程过嚟试下。今次食依个60分钟嘅半自助午餐，主菜有5款可以拣，包括烤肉、炒鸡、炸鸡。一场嚟到想食炒鸡，但因为唔太食得辣，惊食唔到炒辣鸡，所以最后稳阵起见都系拣咗蜜糖味噌炒鸡。除咗主食之外，出面亦有自助吧可以任食。限时60分钟，一坐底已经把握时间即刻出去攞野食，我依个餐可以任食出面嘅前菜、熟食、雪糕同饮品。熟食有薯条、煎饺子、泡菜炒饭、炒粉丝、辣同唔辣嘅鱼板年糕，辣炒五花腩。除咗觉得唔辣𠮶锅年糕煮得淋咗啲唔够烟韧之外，其他味道都正常但唔算特别出色。不过抱住任食心态同埋主食嚟得实在太慢，我都encore咗啲熟食好几次。个主角炒鸡等左20几分钟先有得食，鸡嘅分量唔算好多，另外仲有啲炒杂菜同埋有一旧番薯年糕。我觉得都几好味，炒鸡落咗蜜糖甜甜地，而且都几够味。虽然分量唔多但因为出面仲有其他野食，所以都食得好够饱。依个价钱嚟讲其实都Ok，不过60分钟真系会食得比较急促。