滿堂樂滬京風味 (已搬遷) 新店位置

三号波嘅星期六，嚟到位于黄埔嘅满堂乐沪京风味，墙上嘅大字餐牌，滴住水珠嘅豆浆机，喺店面包饺子嘅阿姨，系上海食店嘅标准布置。店内只有两张大枱，预咗要搭枱，但未至于膊头撞膊头。主打嘅粢饭咸豆浆套餐，粢饭味道清淡，用料充足，但如果饭身再黏啲同包得扎实啲，食起上嚟会更可口。咸豆浆配料包括油炸鬼、咸酸菜粒，虾米。未捞匀就咁食，有啲似鸡白汤𠮶种milky，对好少饮咸豆浆嘅我哋，系新奇嘅。捞匀之后，feel到更明显嘅咸同酸感，同豆浆本身嘅豆香同浓郁平起平坐，𠮶种汤嘅感觉，啱番干爽转凉嘅季节。作为主食嘅担担面，我哋拣咗辣嘅，面身偏硬但有弹性，汤底系一种直接嘅辣，味道唔算好有层次，记得要捞匀沉淀嘅肉碎同花生酱，先「wake」到碗担担面。另加嘅猪扒薄身但油脂丰厚，食落有少少酸，未知系咪肉质问题。黄埔食店林立，选择众多，而呢一间满堂乐主打精简实惠嘅上海菜，喺附近揾食嘅朋友可以一试。