達人烤肉 (已結業)

完满生日饭~阿妹生日，今年就带咗佢去达人烤肉满足佢钟意食韩国嘢嘅欲望，我哋一家三口就叫咗个顶级套餐同石锅鸡肉饭，𠮶 set入面有霜降牛肉、竹筒五花腩肉、秘制特级牛仔骨、秘制牛舌、炸大虾、香肠同香菇，初时见到以为唔够食，但食落份量又啱啱好，所有配菜又任添，感觉真系几好~当中我觉得最好味嘅系秘制特级牛仔骨，腌得好好味，唔会太咸，又肥瘦适中，烧完后极香肉味，无论单食，定包菜食都系无得弹！第 2最爱就系竹筒五花腩肉，望落好似几肥，但烧完后 d油花出晒嚟，加上我仲烧到四面都有少少起焦，食落真系爆脆口，而入面又保留咗满满嘅肉汁，每一啖都极香，完全唔觉肥；而石锅饭𠮶伴汁亦同样精彩，每啖都会令人想一食再食；成餐饭可谓无咩缺点，一定会再翻兜食过！！