御苑皇宴 (已結業)

Mega呢层中菜最有趣嘅地方就系除咗稻香，其他几间我都UP唔出个名，所以食中菜就系咁，如果无一间食开嘅，又或者无几款出名嘅小菜坐阵，好难留住人流。今晚我地都系抱住求其揾一间食嘅心态入座，但整体质素都唔错㖞。最吸引系呢个上汤龙虾芝士伊面！佢虽然无其他酒楼咁用芝士盖面，但系每一啖都有好浓嘅芝士同牛油味，而且主调都系上汤，所以食落去都唔会好油腻。龙虾又爽又弹牙，真系好食！云吞鸡略嫌有点油得制，不过鸡味好浓，而且份量好多，每人分到两碗有多，仲有半边鸡食。金银蛋白菜仔就点都好食架喇，份量都唔算少。但个姜葱鸡就唔得喇！我一心谂住会系爆得好香口嘅姜葱鸡煲，但鸡件完全唔上色，而且姜葱味入唔到旧鸡度，味道好单调。呢道口水鸡就唔正宗喇，用上大量豆豉，味道虽然好，辣油泡过啲鸡，但你就唔可以话佢系口水鸡啰。套餐送嘅桂花糕就为成个晚餐作完美嘅句点，桂花清香可去油腻。