白鬚

营业中

休息中

「白须」一直都好想去试，但码头𠮶边间旧舖宣布结业，结果都无去帮衬。依家知道系 WM Hotel 𠮶边重开新店，而且舖位仲大咗，当然要去食啦。餐厅最出名嘅「白须牛骨汤饭」，已经沽清，残念。白须印尼牛丸粉（$85）接近30分钟先上枱。牛骨汤闻落好香，但饮落好清淡。牛丸有5粒，黑椒味重，牛味一般，弹牙。汤粉系幼米粉，质地够弹性，唔会一夹就断，而且唔糊口，口感不错。要咗少辣，会系牛丸上吱啲酸酸辣辣嘅酱。另外仲有一粒炸得太干嘅炸云吞、一片松脆嘅云吞皮、一粒豆卜、一堆芽菜。印尼鸡汤饭（$88）唔使5分钟就上枱。汤底系微辣嘅黄姜鸡汤，味道浓郁，但唔油腻，不错。鸡肉切粒，份量不少，可能系一直煮，所以肉质唔太嫩滑。另外仲有一大块香脆印尼虾片、半只烚蛋、一粒豆卜、一堆芽菜及椰菜。沙嗲鸡串（$63）约15分钟上枱。有三大串，烤得好靓，闻落已经好香。鸡串本身已经好够味，而且外层微微焦香，里面肉质嫩滑，再点埋沙嗲，味道层次再提升，好食。老实讲，食物质素唔错，餐厅空间感够，环境可以，但收费始终略嫌进取。个人觉得系值得一试，但会否再次帮衬就要睇情况了。PS：另收加一服务费。