金記冰室 (屯門時代廣場北翼) (已結業)

忙左成朝去到下午餐时间先得闲食饭，去左金记冰室食，下午时段都唔少人㖞，大概八成满左右，好彩都唔使等位。拣左张卡位坐，居然有得斟水几特别，而且落单用qr code，一间新款嘅茶餐厅㖞。朋友点嘅铁板餐有个汤送，拣左西汤罗宋汤，几足料，酸酸地带蔬菜味，好饮吖。铁板西冷配薯菜同烧汁，上枱时热辣辣几香㖞。块扒点左七成熟但都几乎熟晒，哈哈，茶餐厅系咁上下啦。块扒唔算太多松肉粉，都软腍嘅，有牛味亦重黑椒味，大大块几抵食。薯菜份量多，劲多薯条，其他有西兰花，粟米同三色豆，仲有啲洋葱垫底。自己就点左口水鸡套餐，个餐包中汤同白饭。鸡件嫩滑，鸡皮下唔肥腻㖞，个口水辣汁好好味，辣度啱啱好，捞饭超正。例汤同白饭正正常常啦，够热无投诉。另外仲加左下午茶餐，因为净加杯冻饮都廿几蚊，加份餐仲抵嘛。芝士西多士真系好邪恶呀～面包炸得香口，中间夹住半瀜芝士，热力又瀜埋块牛油，再淋埋糖浆好味到晕。仲有炸鱼沙律，鱼柳大大块炸得香脆，沙律系杂果薯仔沙律，调味酸酸甜甜好味。饮品要左冻柠茶走甜，茶底香又够冻。qr code落单清楚易用，自己㩒唔怕落错单啦。