拍板小館 (已結業)

踏入十二月，仲有大半个月就做冬，跟住就系过年。我细个时曾经响锦田生活，记得当年到咁上下时候，就有我最钟意嘅盆菜食。虽然我早已搬咗出市区住,可能基于怀旧嘅情怀，每逢到呢个时候，我就会食指大动，周围揾盆菜食。细个时食𠮶啲盆菜，由于当时农村比较贫苦,盆菜啲料不外鱼蛋、猪皮、萝卜等cheap嘢,依家嘢盆菜，啲料就名贵好多，好似最近我去佐敦伟晴街拍板小馆，一坐低就见到「金牌盆菜」嘅海报，都唔使经理介绍，我已经二话不说，指住张海报，话其他𩠌慢慢点，先嚟呢个「金牌盆菜」。哗，呢个「金牌盆菜」真系包罗万有，比张相仲靓，事关张相得色，实物就加埋香和味。鲍鱼弹牙、蚝豉浓郁、大虾香甜、柱甫大粒、发菜爽口、海参软腍、枝竹入味……讲都讲唔晒。我食嘢一向唔问价钱，海报虽标明几多钱，我都冇乜在意。埋单之时，点解张单咁平？以为伙记计错数，叫人埋嚟问下，先知道个盆菜咁正咁丰富，原来只收1888！我心谂，你收我三千我都觉得超值抵食，依家唔系抵食，系超超超级抵食！踏出拍板小馆门口，我只有一种感觉：赚晒！