Golden Monkey (已結業)

上星期日同妈咪，男朋友去 One Island South 食饭，发现 Golden Monkey 同 Pho Bar crossover 嘅一间餐厅。 餐厅楼底好高，有梳化位、吧台、沙律吧同一个开放式厨房 – 即煮越南汤粉。 呢度系自己填点单纸既，餐牌上有泰式沙律、小食、碟头饭；Pho Bar 既越南河粉、喇沙同几种泰式饮品，例如泰式奶茶同珍多冰。我叫咗一份「泰式海南鸡饭」。同新加坡既唔同，唔系配黑酱油，而系鸡饭酱。泰式鸡饭配黄色同粒粒分明既有味鸡油饭、炸蒜粒、芫荽；鸡肉好嫩滑，分别系鸡腿同鸡胸部分。鸡皮下既脂肪亦唔算多，值得一试。另外，喇沙都超有水准，可选米粉或米线。汤底非常开胃，椰香味唔太重，辛辣度适中，淡淡虾米香，质地浓稠。米线亦煮得刚刚好，配料有鸡蛋，鱼片，鱿鱼圈同大量豆卜，推介推介呀！最后有「日本盐味薯条」。薯条炸得脆身，以紫菜粉调味，配有三款酱料，包括我最爱既明太子美乃滋酱！我男朋友密密咁食㖞，哈哈！