Hatsu Japanese Restaurant (已結業)

今日咁啱过金钟做野，所以晏昼就约妈妈喺𠮶头叹返个日式午餐！喺美国银行中心嘅Hatsu环境都几好几舒服，又有好多款定食可以拣！我食火炙平目裙边丼，有成十几块平目裙边，每一块都好肥美，师傅轻轻用火烧一烧个面，啲油就咇晒出黎，真系好正！平时已经好钟意食平目裙边寿司，估唔到有成碗平目裙边丼，简直系我至爱呀！我仲用25蚊加左只特大赤海虾刺身，非常大只，差唔多有筷子咁长，仲好新鲜！妈妈就食烧鲭鱼天妇罗定食，我偷左佢少少野黎试下，鲭鱼都烧得啱啱好，而天妇罗都几多，有两只虾同啲蔬菜，个天妇罗浆唔太厚又脆，算系唔错呀！另外每个餐都有跟味噌汤同蒸蛋，最后又可以拣咖啡或者雪米糍。提一提，仲有任食自助沙律吧，不过个餐实在太丰富喇，我地冇再食沙律喇！虽然话百几蚊一个定食，但有咁好嘅质素同咁多野食，其实系抵食嘅！