小魚兒 (寶漢大廈) (已結業)

今日同朋友喺銅鑼灣行完街，去咗寶漢大廈一間叫「小魚兒」餐廳食明爐烤魚。餐廳嘅裝修新穎，充滿唔同顏色嘅霓虹燈，而且座位非常闊落，就算只有兩個人都會盡量安排四人座位，放個爐上枱之後大家食烤魚都好多空間。餐牌上有好多口味同種類嘅烤魚，根據唔同種類嘅魚有唔同嘅價錢，我哋揀咗$108個隻海鱸魚，有少許大大條嘅魚骨，幾容易挑出嚟，唔會好易誤吞魚骨，一邊魚皮煎香咗，另一邊魚身嫩滑，咬落去啖啖肉得嚟又肉質肥美。因為朋友唔係幾鍾意食辣，烤魚嘅口味我哋揀咗老壇酸菜豆花嘅bb麻同bb辣，濃濃嘅配料同醬汁淋喺魚身上面，食落去非常惹味，爐入面本身附送咗少量嘅寬粉、豆腐、腐竹同芽菜，不過我哋覺得唔夠喉，所以另外加咗一碟鮮腐竹同油麥菜，大家亦都可以根據個人喜好選擇超過幾十款嘅蔬菜同配料，而且可以制定要唔要蔥花、芫荽、洋蔥同蒜頭等等嘅香料。另外，餐廳做緊個特別嘅豪華餐牌，我哋試咗個$68嘅金湯花膠雞絲翅撈飯，翅同花膠就唔算多，不過勝在過下口癮，上湯亦都可以緩解下烤魚嘅麻辣。📍銅鑼灣波斯富街24-30號寶漢大廈1樓位置就腳：🍊🍊🍊🍊餐廳環境：🍊🍊🍊🍊食物味道：🍊🍊🍊🍊🍊整體CP值：🍊🍊🍊🍊🍊