忠記咖啡屋‧私房菜 (已結業)

今日打完波揾野食比我发现呢间位于铜锣湾嘅忠记，啱啱新开当然要试一试。入面环境同一般茶餐厅无异。餐厅有例汤送。第一道小食好快上菜，就系稻庭乌冬配北海道带子。带子外皮稍为煎香，内里依然晶莹剔透，处于鱼生嘅状态，非常鲜嫩。另外酱汁系芥末芝麻，有少少辣，更突出到庭乌冬嘅幼滑细腻嘅口感。芥末蒜泥牛脷非常软稔，配上蒜泥味道非常夹。一碟起码10块牛脷但价钱只系$46，我觉得非常抵食，下次嚟一定encore。另外一道小食系椒盐黄金豆腐，外层香脆内𥚃豆腐依然嫩滑，每一粒既size都差唔多，唔会一粒大一粒细，抵赞!以上三款都系小食，我哋当然食唔饱，所以叫咗沙窝云吞鸡，分量超大。汤底非常鲜甜唔油腻，可以当汤咁饮。云吞系人手制成，皮薄馅靓。至于鸡仍然嫩滑，肉质一啲都唔「鞋」，可谓色香味俱全。最后叫咗杯冻柠茶，非常大杯，茶底亦不错。估唔到喺铜锣湾商业大厦上面有一间几抵食嘅中餐厅。食物价钱系铜锣湾算合理，二人餐都系$308，四人餐就$688。下次多啲人打波之后可以一齐食呢间，试一试佢其他菜式！