鐵牛台灣牛肉麵 (希爾頓大廈)

营业中

休息中

约朋友食饭要选中间点多数都系尖沙咀，如果想食平D当然系去尖东啦，今次朋友约去食铁牛台湾牛肉面，行左一阵先发现原来餐厅系位于地库，餐厅环境都好新净企理，落单方法系先系order纸选好野食，再出收银处付款后，就可以坐低等职员送餐。招牌红烧牛肉面 - 面质同汤底都可以接受， 面虽偏软身但都爽口，汤味道都有浓郁牛肉味，至于牛肉比较大旧，味道都唔错，值得一试。鲜蕃茄大块牛肉面 - 蕃茄汤底有咩特别，只系多左D蕃茄，牛肉个样同红烧牛肉冇分别，但朋友话牛肉韧到咬唔开，最后放弃左冇食晒D牛肉。红烧牛腩配黄金地瓜饭 - 红烧牛腩其实唔错，可惜饭的味道一般，最主要系地瓜唔香。盐酥小拼盘(逢甲盐酥鸡、黄金梅子脆薯和酥炸花枝丸) - 分量有点尴尬，虽然盐酥鸡分量唔算少，但花枝丸得两粒，梅子脆薯又有三旧，其实都比较难分，不过可能咁摆法好睇D啦。味道则盐酥鸡最普通，比较多炸粉；花枝丸好少少，味道正常；梅子脆薯相比下味道最好，配上梅子粉酸酸甜甜够开胃。整体而言，食物质素都唔错，价钱同分量都合理，同朋友来食都系好选择。