A100餐廳

营业中

休息中

难得晨早流流去上水，当然系我最钟意嘅茶餐厅食个早餐先。喺火车站附近有好多茶餐厅拣，都唔知拣边个。行啦行去到啲小巷，有间茶餐厅细细地，但系个门面就几吸引，所以就入咗去食咗早餐。一份标准嘅港式早餐，一定有沙爹牛面、奄列同埋牛油方包。其实唔同茶餐厅做沙嗲牛𠮶个酱汁都有唔同嘅味道，有啲会偏咸啲，有啲就侧重辣味，但普遍都系以啡黑色为主。而呢间就似五香肉丁汁加沙嗲牛，未知呢个沟法系佢专登定唔小心，令我有少少混淆，食落去仲有啲两头唔到岸嘅感觉，而面嘅质地就非常之一般，所以两样加埋起上嚟就失色啲。至于奄列就冇落奶，亦因为煎过熟老火咗。牛油方包就标榜厚切面包，其实薄切多牛油已经够，厚身面包如果发得唔好，就变咗死死实实，成块嘢冻冰冰哽落口好难受，所以面包都唔得。最后唯有杯柠檬茶，正正常常3片柠檬，好彩仲有啲柠檬味。成份早餐都揾唔到重点好食嘅地方，呢个价钱喺其他地区应该会再好啲。