逸東軒

又再黎呢间饮茶，之前食唔方便影相，今次同屋企人食就可以影相出post。虽然系闲日，但都full house，所以记得订位先好黎。闲日都 full 系有原因，因为价钱平过周末好多。闲日点心价位由$38起，周末就要$58起。饮茶紧系要食虾饺，呢度系正宗一口既size，虽则做唔到完美既13折，但整体都算好唔错，皮薄，虾都爽口。烧卖都系饮茶必点，呢度系带子烧卖，上面有片带子都几滑，下面都系猪肉为主，做得有咬口，亦弹牙，唔错～之后黎既系招牌叉烧肠，呢度叉烧咁出名，系真好味，即使系切碎左都咁好食，肠粉都好滑，值得一试。再黎试舞茸上素粉果，舞茸𠮶味好浓好香，整体好爽口清新。美中不足系有芫荽，觉得𠮶味太抢同舞茸唔夹。见姜葱牛肉角未试过，今次就试下。个馅系牛肉球咁，外面包左饺子皮，再加多𠮶蚝油茨，上面再放上姜葱丝。味道唔错，牛肉味浓，亦肉质爽滑。之后再叫左蒜香鲜虾春卷，黎到只系暖暖地，唔系即炸既。所以皮有啲硬，唔够松脆，馅料就正正常常。最后系沙嗲金钱肚，炆到好冧，没咩咬口。味道就普普通通，正常发挥。