心事如塵茶食亭 (海暉大廈) (已結業)

鲗鱼涌新开嘅心事如尘茶食亭，以 Dustykid 为主轴，为客人送上正能量，可谓闹市中嘅心灵驿站。店内到处都有发人深省嘅励志 “金句”，亦有 Dustykid 嘅作品可供借阅，故此相比起食物，我觉得店内嘅氛围更为吸引。点咗店主推介嘅热卖饮品爆柠梳打，即系无糖柠檬汁沟有气梳打，再配以大量新鲜橙片，卖相甚佳；一啖入口，只觉非常清新解渴，确实系消暑恩物👍。再想食啲嘢，于是又叫咗个尘丼丼主食套餐，主菜点咗烟三文鱼沙律，饮品就拣冷泡尘茶王（台湾铁观音）。沙律嘅烟三文鱼份量正常，再加上两片烚蛋同底下嘅蔬菜（粟米，生菜，紫椰菜，蕃茄仔等），感觉丰富；酱汁可以拣芝麻酱或柚子酱，我拣咗后者，酸酸哋，好清新，同个沙律好夹。至于樽铁观音就颇为清香，不过对于已成茶精嘅我嚟讲就略嫌淡咗啲啲😂。