小食皇大排檔

营业中

休息中

作为一个土生土长嘅香港牙，煎酿三宝鱼蛋烧卖嘅小食，都系牙仔最爱之一。呢啲港式嘅小食有时拎来做正餐，都系一个唔错嘅选择。今日去完牛头角做检测，过咗嚟呢间喺淘大侧边嘅小食店🙂。除咗有煎酿三宝之外，仲有肠粉车仔面，亦都有得食炒粉面饭。牙仔今日就食咗煎酿三宝同埋生菜鱼肉，牙爸呢就叫咗车仔面。煎酿三宝有$22/5件起餐厅仲列好晒5件至22件嘅价钱😂鱼蛋啱啱炸起胀卜卜，外边少少脆，入边就弹牙，豆腐都系外边脆入边软绵绵，除咗一般嘅红肠、芋头、番薯之外，佢哋仲有萝卜酥饼，牙爸话呢样系比较少见嘅。生菜鱼肉$21上汤鱼肉够晒弹牙，食完三宝叫返碗清清地嘅生菜鱼肉，感觉就冇咁油腻。车仔面 最低消费系$32 ，牙爸叫菜底、猪扒、猪耳、贡丸、凤爪等等，又估唔到款式都几多。下次再嚟就试炒公仔面同埋炸鸡髀！见到隔篱枱食，好似几吸引。