廿七窩 (已結業)

我食神自问食好嘢食到大，估唔到今次终于遇到一间隐世超水准餐厅！ 一入到餐厅见到张张枱都坐满人，心谂未够八点就已经咁好生意，睇嚟都未必有得食，好在职员面来笑容帮手揾位同招呼客人，今时今日咁嘅服务态度简直一流。 嚟到呢度自然要食撚手菜喇，问吓其中一个鬼鬼地成个碧咸咁靓仔嘅老板有咩好介绍，佢就因应返我地嘅口味同要求去介绍，老板咁体贴，我地自然就交俾佢发板。 先嚟香口嘅伴酒小食（黄金炸鱼皮，炸鸡粒同炸鱿鱼圈），一食落口就觉得香脆可口，再饮啖啤酒随即提高食欲。 再嚟豉油皇中虾，每一只虾都非常入味，外脆内爽，好食到连虾头都食埋。至于豉汁蒸鳝，色、香、味俱全，鱼肉又鲜又爽口。 而霸皇鸡一上枱就已经觉得好有气派，一入口更加惊为天人！鸡居然有鸡味，仲要同时食到鲜味，本食神已经有好多年未食过又入味又带鲜嘅鸡，值得表扬。 最后嘅炸猪手亦无得弹，皮脆而肉嫩，摆盘一流加上用一朵花去衬托。既系美食又同时系艺术品。 一餐饭居然有味觉同视觉嘅一流感受，真系不枉此行！