影片
更多
2011-10-26
2308 浏览
早前见到杂志报导，知道大围有位高人---梁虹光师傅，廿几年来，独沽一味，百宝鸡，用其独家刀法，去尖骨、起肥膏，务求大人食得健康，小朋友食得开心，净系呢一份精神同心意，足以叫我专程去一试。百宝鸡位于大围积信街41号，唔难揾，舖面唔大，但贴满报纸、杂志嘅宣传和报导，仲有前港督彭定康试食及与大班郑经翰嘅合照，非常威水。今日系有备以来，所以一早已经打电话来预订，因为梁师傅坚持即叫即斩，斩鸡壹只需时最快都要十二分钟，如果有客人等候，随时要敖上个多小时，所以梁师傅早已张贴声明，提醒食客最好提前两小时预订，非常巴闭。我今日比预订时间早咗到，眼见舖头门已开，但空冇一人，便站在门外大叫一声，因为舖头嘅门口系有一趟半腰掩门拦著，所以我冇硬闯；有一把雄厚嘅声音系舖头后面嘅工场传出来：「系咪订咗鸡？」「系。」跟著，就见到一个身穿白色工衣，红色短裤嘅中年男子，由工场走出来，虽然真人比相中人老，亦比较瘦，但我肯定这名中年男子，就系梁虹光师傅，佢二话不说，随手拿起工作枱上嘅厨师帽，往头顶一笠，便走到砧板面前，一手拿起刀子，另一手拿起百宝鸡，埋首开工，非常酷。根据报导，梁师傅只用120天大嘅农场活鸡，每只重约四斤，每
百宝鸡位于大围积信街41号，唔难揾，舖面唔大，但贴满报纸、杂志嘅宣传和报导，仲有前港督彭定康试食及与大班郑经翰嘅合照，非常威水。
今日系有备以来，所以一早已经打电话来预订，因为梁师傅坚持即叫即斩，斩鸡壹只需时最快都要十二分钟，如果有客人等候，随时要敖上个多小时，所以梁师傅早已张贴声明，提醒食客最好提前两小时预订，非常巴闭。
我今日比预订时间早咗到，眼见舖头门已开，但空冇一人，便站在门外大叫一声，因为舖头嘅门口系有一趟半腰掩门拦著，所以我冇硬闯；有一把雄厚嘅声音系舖头后面嘅工场传出来：「系咪订咗鸡？」「系。」跟著，就见到一个身穿白色工衣，红色短裤嘅中年男子，由工场走出来，虽然真人比相中人老，亦比较瘦，但我肯定这名中年男子，就系梁虹光师傅，佢二话不说，随手拿起工作枱上嘅厨师帽，往头顶一笠，便走到砧板面前，一手拿起刀子，另一手拿起百宝鸡，埋首开工，非常酷。根据报导，梁师傅只用120天大嘅农场活鸡，每只重约四斤，每天新鲜运到，洗净㓥好后，浸入秘制卤水汁前，仲要系颈位开𠮶小孔，等d卤水汁可以彻底渗入鸡嘅内部，确保更加入味；至于𠮶卤水汁就更加巴闭，梁师傅弃用花椒、八角，改用海味、瑶柱、沙姜、香叶和小茴等香料熬制而成，香味独特，绝非坊间一般卤水汁可以媲美，非常正。
期间，见梁师傅埋头苦干，手起刀落，可以话快、狠、准，用其纯熟嘅独家刀法，将只百宝鸡煎皮拆骨；见梁师傅先将鸡皮起出，细心地切除皮下肥膏，再起骨，跟著就用刀面拍松d鸡肉，再涂上秘制百宝汁，才放入外卖盒；梁师傅之所以咁坚持佢嘅刀法，因为佢认为皮下肥膏系坏胆固醇，食咗无益，所以要切除；至于起尖骨，系因为要方便老人家和小朋友食用，以防佢哋被尖骨骾衬，非常细心。
除咗百宝鸡 ($200一只) 外，仲有BB乳鸽$30、鸡脚$25、鸡肾$30、鸡肝$30、鸡汤$5，如果唔想买全只鸡，仲可以买半只$100，甚至饭盒都有，有百宝鸡饭$28及BB乳鸽饭$35 (写明系一只乳鸽)，要脾就加$5，种类唔多，但非常详细。
等了又等，足足等咗廿几分钟，终于见到我𠮶盒百宝鸡啦，仲有两盒白饭，梁师傅强调系用金象香米煮，并非一般劣等米，只收$5一盒；见鸡汤亦都系$5一盅，叫咗三盅，不过梁师傅话要等多几分钟，例汤唔系一早煲定，即搯即有咩？唔明，只见梁师傅系砧板后面，搅吓搅吓，咁我亦只好继续耐心等待，非常耐。系呢个时候，适逢老板娘---梁太刚啱返来，见我系度等，好主动咁同我倾吓计，原来佢哋早于1985年已经系大围卖百宝鸡，不过当时并唔系呢个舖位，系同一条街前几个舖位，比依家嘅舖位仲要细，所以冇厨房，只有一个砧板、一个收银柜咁大，当时，要去美林村嘅大牌档，同人借厨房用，每当d鸡煮好后，就用架手推车，推返来舖头卖，又辛苦，又麻烦；及后，多咗d报纸、杂志宣传，亦多咗d口碑，生意自然做多咗，所以系1988年，就买咗依家嘅舖位，终于拥有自己嘅工场兼舖面，一直做到依家，非常长情。
闲话间，梁师傅亦有问我是否看到饮食男女嘅介绍而来，我直认不讳，我亦表示非常欣赏梁师傅嘅敬业乐业精神，所以专程造访，梁师傅亦觉得报导详尽，非常开心，仲攞埋报导入面所提及嘅百年妙药俾我睇，佢话系爷爷留低俾佢，𠮶樽入面系真空，所以d药到依家仲保存得好好，系用来医眼疾；梁太仲话明日下午会有亚洲电视嚟访问，似乎佢哋对于传媒嘅访问系乐此不疲，非常健谈。
汤亦都准备好了，梁太帮我打包好之后，梁师傅仲俾咗张锦囊我，临行前，仲同我讲：「包你一世唔会肚痛。」𠮶张锦囊，其实系两张A4纸，四面都写满字，系梁师傅嘅亲笔字迹，大致嘅内容系话食咗d受污染或生冷食物而肚痛，最佳嘅治疗方法，就系饮70oC热滚水，因为有杀菌功能，字里行间，亦表明咗梁师傅对政府嘅无能与不满，我并非医师，亦无花时间考究，未知确实与否，但听落言之凿凿，颇有趣，亦不得不佩服梁师傅嘅伟大无私嘅精神；原来梁师傅嘅爷爷同爸爸都系中医，所以梁师傅对医术都略懂一二，闲来，梁师傅就会把佢所认识嘅或时下嘅话题、见解，手写下来，再影印派俾街坊，希望造福人群，非常有抱负。
身负重任，要将梁师傅嘅精髓带返公司与同事分享，所以我重踏油门，第一时间赶返公司开餐。汤，一人一盅，都颇大盅，其实一盅都足够两人用，卖相就一般，表面上有一层薄油，中间夹杂著几点黑色，真的不吸引；呷了一口，味道不浓，亦不咸，颇清，唔腻，的确系鸡汤，而且冇味精，唔称得上好好饮，但$5一碗真材实料嘅鸡汤，比坊间嘅味精例汤，好饮百倍。
白饭，一般饭盒嘅份量，饭粒鲜明，唔会一嚿嚿，食了一啖，有淡淡嘅饭香，但我喜欢比较硬身，略嫌偏软少少，但我两位秘书，则非常欣赏，觉得很软熟，亦好肯定系金象香米，因为佢哋屋企都系食金象米，哈哈。
至于主角百宝鸡，份量十足，一个饭盒，装得满满，鸡皮呈啡色，香味一般，唔浓烈，正如杂志所讲，望落有d似豉油鸡，不过颜色则比豉油鸡略浅；二话不说，夹起一件鸡脾肉，果然皮肉分离，没有半点肥膏，一啖咬落去，十分嫩滑，味道香，且鲜甜，卤水汁嘅味道亦冇一般豉油鸡咁咸，可能由于梁师傅系每件鸡都涂上百宝汁，所以够香够味；再试一件鸡胸，当然冇鸡脾咁滑，略嚡，但唔韧；至于鸡背，虽然肉唔多，但鸡味最浓郁；若嫌百宝汁味道唔够，梁师傅亦随鸡附送一小盒百宝汁，可以蘸来吃，味道更加浓烈。
肥膏的确切除得十分干净，成盒鸡，连一点肥膏都揾唔到；但骨，则并非完全起哂，鸡背、鸡胸等位置，仲有骨落地；鸡皮起咗肥膏后，确实吸引，但见仲有少量鸡毛；我并非想系鸡蛋里挑骨头，只系想将所见所闻，如实与大家分享。平心而论，百宝鸡系好食，比起一般烧味舖嘅鸡，已经好好多，但未至于话非食不可，而且佢冇堂食，一定要外卖攞走，但系斩料加𩠌呢家嘢，通常都系要方便，系屋企附近就最理想，有几多间，可以做到太子永合隆咁，d客系专程揸车嚟买外卖，就算有，百宝鸡所处嘅位置，又唔方便客人泊车买走 (因为积信街路面狭窄，好容易阻塞交通)，所以系经营上，系有一定嘅难度。
我哋三个人，就将一只鸡，两盒饭，三盅汤，一扫而清，合并$225，每人平均$75，唔算平，但非常饱，整顿饭，味香，但唔咸，食完后，都唔觉口渴，难得；$200一只鸡，可能好多人都会觉得贵，但系街市卖一只活鸡，都要佰几蚊啦，所以我觉得$200一只新鲜鸡并唔贵。
大家只要睇真d梁师傅嘅心机同诚意，就会觉得百宝鸡系值得保存落去，要保存嘅，唔单止系食物本身，最重要嘅，系梁师傅𠮶份心意，凡事都以客人为先，处处都为客人设想；依家，个个都口口声声话保育，但系往往都要到濒临危险嘅边缘，先去做番d嘢，可以的话，大家都应该尽早出一分力，支持一吓本地文化。
张贴
