荳子 (大埔超級城D區)

营业中

休息中

嚟食个下午茶，见有荳子，就系呢个分咗四个区域嘅商场揾，原来系系同ＡＢＣ区分隔咗一小段路嘅Ｄ区，仲系扶手电梯后面近玻璃门𠮶边，唔系成日嚟嘅真系觉得有啲难揾。但好多人都好熟路，咁隐蔽都要等差不多十张枱先有位。先拣个饮品，呢度有唔少小仓红豆嘅抹茶甜品，今日就试类似嘅饮品，大大粒小仓红豆，浓浓嘅抹茶，再加点泡抹，面头仲有BEANS嘅印花，好靓，亦好好味，饮完一杯都好似唔系好够咁。友人就拣咗沙冰系列，原来沙冰之余仲有好厚嘅忌廉，好够份量，够哂冻，唔错。今次唔食甜品，两个人就叫啲小食，见每款小食都大约五十蚊，见小食拼盘都系一百蚊左右，叫个拼盘好似开心啲，仲有炸洋葱圈，肉酱薯条，蜜糖鸡翼，香辣鸡翼，好丰富。两款鸡翼都好惹味，只系香辣𠮶款就一啲都唔辣，同埋洋葱圈拎到嚟时已经淋咗。呢度冇限时，不时有人帮我吔收咗唔要嘅餐具，但冇赶我吔走，揾个地方坐下抖下倾下计，呢度系唔错嘅选择。