喇沙大少 (已結業)

初时想快食快走赶睇戏，贪佢有位唔使等，即入，点之中晒计。叫左个鸡喇沙，虾酱炒饭，肉骨茶，3样野各有特色。😨鸡喇沙名乎其实地鸡，如幻似真，揾唔到有鸡，汤亦揾唔到鸡味，到底是有鸡定冇鸡？好一个鸡喇沙。成碗野冇乜味道，最啱感冒个阵食，反正都冇味觉。虾酱炒饭仲有感觉，因为好……唔识讲，食落口同食瓷饭一样，系一样，即系饭有饭味，𩠌有𩠌味，两者各为其主，亦河水不犯井水，好难先可以将饭炒食咁。当中最发人心省既系，其实马来西亚既虾酱系唔系淡淡地，好似1比99既川贝枇杷膏咁既味！到肉骨茶出场，其实个侍应放低左我都未知，因为佢简直去到一个金庸武侠小说中，用毒高手最高境界，就系无色无味无嗅！一煲好似津路加杞子加3条金沙骨既肉骨茶就系咁出场。本人对津路有极高评价，绝无任何贬斥之意，不过我真系想不到有其他更贴近的比喻先用佢做例子。食完成餐之后，都系地下老麦再补飞。