碗碗香 (已結業)

约左友人黎铜锣湾行街，就黎加路连山道揾下有咩食。未喺香港食过贵州菜，所以就去试下。呢度招牌系食牛肉面，由于同行友人唔系好食得辣，所以佢叫左清汤牛肉面，我就叫左bb辣嘅红油牛肉面。红油牛肉面 - 饮左啖汤，唔系好油，牛肉好正，牛味浓，重点系唔痴牙，你知啦，最怕出街食牛肉食到啲牙缝都系肉，好影响。同埋啲面好特别，样似乌冬，但滑过乌冬同埋弹牙啲。真心推介！bb辣嘅程度一般港人都应该食到。清汤牛肉面 - 老板话清汤冇加味精，试左啖，系几清，饮多几啖先。呢碗唔系牛肉粒，系牛展，一样咁好食，牛味好浓好香。呢度啲牛真心唔错。老板仲有推介苦丁茶，话系清热，就叫左一冻一热试下。友人话有啲苦，我觉得可以接受，可能我饮冻，有啲冰稀释下，饮热可能会苦少少。不过食完碗热野之后饮返杯冻野系几舒服。见到隔离枱对情侣一人一杯玫瑰冰粉，我同友人都叫左一杯试下。几特别，啲冰粉好清凉同好香玫瑰味。最正系啲芝麻，炒得好香，夏天食几正！最后埋单一人$85，几抵👍🏻