影片
更多
2009-06-25
111 浏览
行家兼老友约食饭，今次由我发板，当然要揾间好嘢试试，今期就去试位于中环置地出名嘅过江龙，由英国进驻嘅日本料理，仲好似系啱啱攞咗个由 英国饮食权威杂志《餐厅》选为2009年全球100间最佳餐厅，名气就热爆，唔知质素系点。去到置地广场楼下，有数部 lift 可以直达餐厅，上到餐厅，receptionist 随即礼貌地带我入坐，厨房是开放式的，坐椅阔落，有arm-rest，似去咗酒店coffee shop ; 我两今晚去嘅系餐厅部份，餐厅尽头有一间玻璃房，可以做私人饭局，布置特别，设计师似乎好喜欢利用玻璃做嘅装修，餐厅楼底又高，够哂气派，用上落地玻璃，但系枱与枱之间嘅距离反而太近，变得私人空间减少，美中不足 ; 而沿旋转楼梯拾级而上，楼上仲有一层酒吧区，睇设计上应该系迎合西方人口味似的。我朋友有个背囊，佢地可以代客人保管住，而且系独立的，有一张卡比你揸手，走之前交比侍应就可以攞返你嘅物品，照顾周到。menu 一打开头版有一页序，讲解餐厅主旨。一开始佢话自己系当代日本居酒屋，我又唔觉㖞，其实一入门口我就唔觉佢系日本料理，似食西餐多过食日本菜 ; 佢话自己唔系供应定食，而系for sharing
去到置地广场楼下，有数部 lift 可以直达餐厅，上到餐厅，receptionist 随即礼貌地带我入坐，厨房是开放式的，坐椅阔落，有arm-rest，似去咗酒店coffee shop ; 我两今晚去嘅系餐厅部份，餐厅尽头有一间玻璃房，可以做私人饭局，布置特别，设计师似乎好喜欢利用玻璃做嘅装修，餐厅楼底又高，够哂气派，用上落地玻璃，但系枱与枱之间嘅距离反而太近，变得私人空间减少，美中不足 ; 而沿旋转楼梯拾级而上，楼上仲有一层酒吧区，睇设计上应该系迎合西方人口味似的。
我朋友有个背囊，佢地可以代客人保管住，而且系独立的，有一张卡比你揸手，走之前交比侍应就可以攞返你嘅物品，照顾周到。
menu 一打开头版有一页序，讲解餐厅主旨。一开始佢话自己系当代日本居酒屋，我又唔觉㖞，其实一入门口我就唔觉佢系日本料理，似食西餐多过食日本菜 ; 佢话自己唔系供应定食，而系for sharing咁就系人都知日本居酒屋咪就系咁架啦，驶乜佢讲呢又 ; 最后，仲要讲明𩠌菜系会喺席间一路上枱，咁当然啦，唔通学似中国菜摆到成枱都系，又或者法国菜咁未食完一道菜，唔可以上第二道菜咩。写呢段嘢嘅人真系唔知想写比边过睇呢。
仲有一点特别嘅，佢地有春日推介，亦都有set供应嘅。
讲返食物方面：(以下系依照当晚上菜次序)
1. Hot Sake Carafe - Tengumai, Yawara Junmai (A fine Jumai which brings out its true flavour when heated, A comfort sake to warm up your soul) 300ml $160 - 相片欠奉因卖相冇乜特别，器皿用暖水坐住，保持温度，味道入口唔太清香，老友亦觉得唔够纯，可能我拣得太cheap挂，因为好多酒以同等份量都要好几百，甚至上千蚊，不过放得呢只酒喺menu比客人拣，我谂佢地都应该慎重选择货源。
2. arjun's chu toro roll (prime tuna and finely diced spring onions) 葱花中级鲔鱼卷 $110 - 一上枱，我仍然挂住影相之际，老友已经叫我快啲吃，因为紫菜已经开始淋，但系只不过系上枱两分钟，好明显系处理食材技术出问题，其实我见上枱时候已经淋咗，有可能系佢嘅饭实在有啲偏湿，不过佢嘅toro茸因为非常肥美，鱼脂多而甘香，用料上乘但烹调技术尚待改善 ; 子姜鲜嫰，Wasabi新鲜磨制，呢种级数餐厅绝对要用上，此点不足为奇。
3. tai no sashimi salada to umesu (sea bream sashimi salad with mizuna, myoga and umeboshi vinaigrette) 薄切鲷鱼沙拉配梅子醋 $120 - 系佢地嘅春日推介之一，鲷鱼鲜味，下面舖有生菜丝，洒上梅子醋，但味道过浓，虽然鱼够新鲜，但鲜味被抢。
4. Sashimi moriawase 7 sashimi selection $540 - 每款三片，合共21片，价钱合理，而且真系相当新鲜，用上去一大旧冰块同碎冰盛载，难怪咁多人都话要试佢地嘅刺身，甘虾爽甜 ; 三文鱼肥瘦适中，油脂分布均匀 ; 蓝鳍鲔(bluefin tuna)虽然油脂唔重，但冇筋，值得一赞 ; 帆立贝就唔够爽，口感欠奉 ; 总括来说，一个 "鲜" 字。
5. edamame (steamed with sea salt) 海盐枝豆 $40 - 做佐酒食品或前菜就ok，但系竟然食到一半嘅中途至上枱就未免........枝豆软熟，洒上粗海盐，味道ok。
6. yasai no moriawase (assorted vegetables tempura) 野菜天妇罗 $80 - 脆桨够薄，炸嘅火喉控制恰当，吸油纸上冇咩多余油份，但系蕃薯、南瓜就略嫌切得太薄，冇咩口感之余，仲因为薄身关系，炸嘅途中水份好易流失。
7. corn tempura 粟米天妇罗 - 用上粟米做天妇罗都系第一次见，系由侍应介绍，原来系未放上主餐牌的，粟米表面积大，可以上多啲炸桨，炸至金黄香脆，质地有啲似爆谷，但系粟米入面水份充足，而且鲜甜好多，洒上些少胡椒粉，配埋酒嚟食，感觉一流。
8. buta-bara yuzu miso (black pork belly with yuzu and miso) 烧黑豚腩肉配柚子面豉酱 $165 - 两串猪腩肉，每串三旧，卖相吸引，第一旧半肥半瘦，可惜肥猪肉部份系肥猪肉一大旧，入口一咬，猪肉即时在口溶化，感觉系缺堤泛滥一样似的，顿时成个口都系猪油，感觉只系比食东坡肉好少少，呢种感觉本人就唔识欣赏 ; 第二旧就少啲肥多啲瘦，比之前多啲咬口，用上柚子面豉酱都系啱嘅，柚子带少少酸可以中和多余油份 ; 最后一旧就全瘦，竟然系全瘦，唔知佢想点，仲难食过煲老火汤嘅瘦肉，非常硬而且鞋口，唔合格。结论系，虽然第一旧颇肥腻，但亦都系我俩觉得最好味嘅。
9. tokudai wafu asparagasu (asparagus with wafu sauce and sesame) 芝麻烧露荀 $70 - 露荀鲜嫰，轻轻地烧一烧，用芝麻加wafu sauce(豉油中加上醋味沙律酱)，清甜露荀配上浓味酱油，味道得到平衡，处理得非常好。
10. 盐烧三文鱼头 - 三文鱼本身够肥，烧出嚟故然特别香，一碟四旧，见厨师选取都系鱼肉偏多部位，冇鱼头骨同胶质比你啜，我争啲以为佢地上错𩠌，可以话系似鱼鲛或者系鱼身嘅肉多啲，好明显唔系为本地人而设 ; 外面烧得香脆，里面亦唔会太干，只系感觉唔似食鱼头吧。
11. 香蕉蛋糕配绿茶雪糕 - 餐牌入面唔见甜品项目，侍应介绍咗呢样，香蕉蛋糕香蕉味浓而且松软，不过唔知点解要配上同样重味嘅黑芝麻嚟抢夺佢嘅味道 ; 绿茶雪糕一上枱就知出事，你睇吓佢嘅颜色，竟然系呈浅绿色，入口净啲感觉唔到自己系食紧绿茶雪糕，味道淡如水，最严重系食食吓有硬物，咪系细小冰粒，一定系溶过，侍应解释佢地嘅雪糕系自己制造的，so what? I dun care，我最关心嘅系处理食物嘅质素同技巧，如果系自己搞唔掂嘅，倒不如出去订人地做嘅出品返嚟卖好过。
12. 玄米茶 - 因为食得太饱，老友叫咗茶嚟消滞，又唔知佢地系咪serve惯西人，都系一个order serve 一个人嘅份量，竟然只系拎一只杯嚟，，又话写到明系sharing，呢点就不够细心了。
Comments: 又一间名过于实，话自己做日本料理，入面真系唔多觉有日本人嚟吃，但差不多全场九成客系西人，而且唔知系咪我地张枱离open kitchen太远，我就见唔到佢地起用日本师傅，唔见得会有几正宗。但点解佢地都会入围呢?? 我估好可能系与佢嘅总部地点有关啰。不过服务方面算几专业嘅，细心，非常有礼貌，每上一道菜都会讲解制法同埋酱料点用，但系𩠌菜上枱次序就好似未经安排咁，呢点就唔专业，应该由淡食到浓，前菜至到主菜，刺身之后到寿司卷物。食完后，我俩都觉得如果自己出钱嘅话，一定唔会嚟呢度食，佢地做嘅日本菜系比西人食嘅。
张贴
