利寶閣 (已結業)

听朋友讲有间酒楼有叉烧饭加佛跳墙唔错，我第一时间就涌出星爷食神既回忆，二话不说就约朋友去试下系咩一回事。第二日放工同几个朋友一齐去食，一坐底我已经决定要食谷饲豚肉叉烧饭配原盅佛跳墙，其他就交比朋友决定。过咗阵，我个黯然销魂饭同超级无敌海景佛跳墙就到咗，叉烧饭大大件，咬落去够弹牙好满足，而佛跳墙就好足料，有鲍鱼海参等，整体味道醇，去开既话可以试下依个组合。然后系蒜片和牛粒，和牛粒淋身牛味重但油份不足，配蒜片好夹。之后系明太子赛螃蟹，蟹肉十足蛋白亦好滑，平时好少食，但感觉唔错。再黎既系啫啫辽参鸡煲，鸡肉好滑辽参爽中带腍，葱入哂味好好食。到肉丝煎两面黄，汤汁另上可以保持面质香脆，我自己比较钟意唔落汤汁就咁食。最后系脆皮香芒虾球，虾球爽口，配个汁甜甜地淡淡芒果味亦几夹虾肉。食到尾叫咗个苹果拔丝，糖丝外型华丽，苹果表面好脆，果肉爽口香甜，系个唔错既结尾。总结，依餐饭可以食到电影既感觉，整体感觉良好。