鬼金棒

营业中

休息中

周四傍晚与表妹啤咗个几钟头欢乐时光后，两口子就去咗附近一家新开嘅拉面店「鬼金棒」度医肚。日本过江龙虽以辣为名，但「鬼门」外嘅辣牌上清楚道出拉面其实系可选「无辣」及「无麻」嘅。店内梁上排满大大小小嘅鬼面具，桌上亦摆出可爱嘅鬼公仔作装饰，相当吻合店名。店子前方右手边位置为开放式厨房，大约有十个吧位围绕著。由于六点半左右已经八成满座，两口子就被安排坐较入嘅合并式散座。餐桌上有自助筷子、纸巾、调味料及清水，齐备洁净。电子落单环保简易。点好菜，妹妹仔迅即一人派发一条围裙，十分卫生。并为两个酒鬼送上冻啤！小肥点咗碗无辣无麻嘅「芫荽麻辣味噌拉面」（$110）。如相所示，横影掂影主材芫荽都成座山咁高，芫荽实属劲量级！芳香嘅芫荽山下藏有清新爽脆嘅芽菜。厚厚嘅五花腩层次分明，而且入哂味。拉面面条粗身得黎烟韧弹牙。「鬼金棒」环境简洁企理，年轻嘅服务生友善有耐性，「芫荽麻辣味噌拉面」嘅芫荽山卖相不单够哂震撼，拉面亦量足饱肚，如果可以有埋日本生啤饮就更加理想啦！