香港浸信會神學院食堂 (已結業)

今晚有朋自远方来，由港岛区嚟到新界区当然要带佢食啲好少少嘅嘢啦，呢间餐厅系我觉得值得推荐比朋友的。今次又嚟到呢间要自助式开枱、执枱嘅餐厅，我地人少少，但都叫了4𩠌1炒米，3个人埋单$355，都算系咁啦，碟碟都够晒份量，饱到食唔晒。 姜葱霸王鸡，第一次喺度食霸王鸡原来咁好食㖞，点解啲鸡肉可以咁淋咁滑架，好好食呀，简简单单配有姜葱嘅香味已经好足够。士多啤梨骨又系我爱食之一嘅菜式，酸酸甜甜嘅士多啤梨酱好开胃，配煎至刚刚好嘅金黄色腩排甘香可口，小朋友应该都喜欢食。椒盐鲜鱿，呢度嘅椒盐菜式亦都做得好出色，炸得金黄香脆，鲜鱿弹牙而不过火。瑶柱海味粉丝杂菜煲，舍得用虾干而唔用虾米，亦都有健康嘅木耳和腐竹，呢个杂菜煲又系无得输啦。今次唯一令我失望嘅星州炒米，虽然比之前大碟，卖相都好吸引，但味道好淡无咖哩味，个服务员听到我地话无味后，佢即刻帮我地攞入去再炒过，但都系去唔返之前嘅水准。