宙串燒日式食堂

营业中

休息中

滑蛋吉列猪扒丼配蕃茄汁（$60）滑蛋颇滑但无咩蛋味；吉猪炸粉脆身唔硬实，猪扒算厚身，有口感，少少嚡但可接受；蕃茄汁微酸少甜，味道不错；饭系珍珠米，较黏身；仲有啲椰菜丝。丼饭会附送一杯冻绿茶。薯条（$18）加肉酱（+$10）即炸，粗薯条，除咗肉酱，仲有芝士。肉酱系牛肉碎，味浓。薯条同肉酱份量都多，食到最后一条薯条都仲有芝士肉酱。串烧套餐 B（$73）・酱烧猪腩肉，有三件，酱汁微甜，猪腩肉有咬口。・酱烧烟肉芝士，有三件，微咸烟肉卷住芝士。・酱烧猪大肠，无猪臭味，有𡁻口，味道不错。・烧牛油粟米条，有三条，普通。鸡软骨肉棒串配泡菜（$23）鸡软骨棒系来货𠮶款，无咩特别，但夹埋泡菜一齐食又几特别。厚烧牛脷（$25）有三片，唔系爽口𠮶款嘅牛舌，系炆过嘅牛脷再烧，口感偏腍，味道正常。小店家庭式经营，一位楼面一位厨师，坐位唔多，收费合理。如果要比意见，我觉得串烧嘅火喉仲差啲，可以提升一吓。