瑪麗蓮美國餐廳 (已搬遷) 新店位置

秋风起就特别易饿，又唔想坐铺头入面咁死固固，醒起有一段时间无帮衬〈因为这里地方细，经常坐爆人〉，决定晚一点〈八时半后〉先去，唔使点等位可以坐门口，边叹住凉风阵阵边叹美食，乜都抵返晒！如果你未嚟过，见到套餐价钱可能会有点意外，唔系茶餐厅𠮶回事，但坐落发觉咁多外国人嚟外卖拿走，之后到见到自己𠮶order上台就即刻明白，因为真系份量十足！唔系太饿的话，女仔人家分分钟食唔晒要打包拎走。这晚胃口唔错，决定叫个猪手套餐，因为之前见到有个上咗年纪，心想应该戒肥腻嘅伯伯，二话不说坐低就即刻叫咗同一个餐，佢绝对系对只猪手念念不忘，食咗先算！而同一时间又有鬼佬落单要猪手外卖，心谂唔通真系好食得咁紧要？我之前钟情佢地个ribs，系即场烧嘅，所以要等，但个酱汁极为惹味，食到坐街边、啜晒手指做佢生招牌，我都唔mind，所以对只猪手我下意识要求更高...个周打汤我唔详述，又系见不断有人外卖，无错只系外卖一个餐汤〈其他地方除咗中汤，我未见过会卖走西汤啰！〉我的看法是这里料多兼够滑，不过份量偏细！沙律就都系𠮶类嘢，性格欠奉。登！登！登！终于主角登场，哗！重量级嘅猪手望落干身，有少少焦，傍住一督薯泥，卖相百份百美国式。