ODEA (已結業)

今次系Odea呢餐饭，整体体验几好。首先，服务真系好好，Waiter会帮女士拉櫈同铺餐巾，送多咗一样餐前小食俾我哋，上完每一道菜都会介绍下𠮶道菜系咩，同埋建议食法，当日我哋系庆祝生日，Waiter仲帮我哋将啲嘢摆返靓个位影相。然后，啲食物真系好精致，感受到厨师系用心去准备，色香味俱全。我唔敢讲每一样都啱自己口味，好多款食物对于我来讲都系新奇嘅体验，食物嘅味道有好多层次，令我更加用心去品尝每一啖嘅味道。我觉得𠮶一餐食物嘅口感整体都好好，我谂咗好耐要点形容⋯第一，我觉得食物全部都「唔干」。点计咁讲呢，唔系讲紧佢地嘅食物有冇汁，而系啲食物都煮得啱啱好，特别系啲肉类，无论系鳕鱼、龙虾、猪架，都唔会过熟，入口非常软熟，食物嘅水份都保留得好好。特别系龙虾，真系我食过最好食嘅龙虾🦞！佢嘅熟度系啱啱好，系其他地方食过嘅龙虾大多数都过熟，食落似擦纸胶，所以我一直以为龙虾就系咁嘅口感，无谂过龙虾原来可以咁好食🥹第二，食物有顾及食用者嘅体验，上菜时嘅温度都啱啱好，啲食物系「暖」嘅 — 唔系一早煮好晒摆到冻咗，唔系热到辣口，而系入口觉得温暖，啱啱好感受到食物嘅质感同味道，令我真心觉得我真系好享受呢一餐嘅食物。