海言どんぶり専門店

营业中

休息中

星期六日中环都唔会好多人返工，喺中上环行非常舒服，晚饭时间突然想食日本野，经过见到海言，一间喺地库隐蔽嘅小店，睇套餐牌好似唔错，于是入去试吓。店员推介咗海言厨师发办特上刺身饭和特上江户前散寿司，我哋就叫咗每人一个试吓。两款海鲜丼米饭底都唔同，刺身饭用上醋米饭而江户前散寿司，就更加配上少量紫菜，日本生姜，芝麻嘅饭底，突显到餐厅对于米饭都非常用心，套餐仲会附上沙律茶碗蒸及樱花虾面豉汤。厨师发办刺身饭嘅刺身系用上时令食材，包括抽刀，𫚕鱼，新鲜希灵鱼，金目鲷等等，质素非常高，比起其他动不动都过千元嘅厨师发办更加高质。江户前散寿司就会用上传统鱼类食材，仲会有香港人俗称嘅红衫鱼日本称之为金线鲷，腐皮玉子烧等等。两款刺身饭各有特色，呢个价钱食到咁高质嘅海鲜丼饭真系冇得输，餐厅如果将佢转为传统厨师发办，收费再贵几级绝对冇问题，非常推荐。