Basic Bistro

营业中

休息中

想揾个地方同妈咪庆祝生日，平时同老人家食饭多数食中菜，今次带佢食西餐。呢间餐厅喺屋企附近，开咗冇几耐，估唔到有惊喜㖞！餐厅唔算好大，都坐得几舒服，大部份嘢食都好味，价钱仲好抵添，性价比好高。一坐低，侍应就送上一兜炸芋头脆片，好薄好脆，咸咸地，超好味。蓝青口份量好足，但唔够鲜味。Beef burger百几蚊，好抵食，薯条热辣辣，脆卜卜。Carbonara意粉个样麻麻哋，但味道十分好，妈咪最爱。个 Classic Shepherd’s Pie 估唔到咁大份，不过都几heavy，食唔晒，打包返屋企再食。中间仲发生咗一个小插曲，我细佬唔小心整跌咗杯酒，成杯倒泻晒落地下，个侍应好快咁埋嚟抹干净个地，之后仲重新斟过一杯俾佢，超贴心服务，大赞。最后甜品点咗朱古力心太软，同埋橙酒班㦸，侍应喺你面前点火，好有仪式感。我同侍应讲妈咪生日，叫佢帮我插支蜡烛，佢仲喺上面写埋Happy birthday，原来个朱古力心太软冇收我哋钱，话系请我妈咪食嘅，好开心，下次一定会再嚟。