燃味棧 (已搬遷) 新店位置

第一篇食评，希望可以支持下小店！相信大部分人就算唔系住荃湾，都总会听过呢度有好多街头小食。平时好少入荃湾嘅我，今日就因为心血来潮想扫街而嚟咗觅食～漫无目的咁行到一个巷仔位，男朋友拉住我话好似有好嘢食，一入到去就见到燃味栈。舖位唔大，价钱牌挂喺店面一目了然，其实又冇话咩好大阵食物香味吸引路人，但赶住医肚嘅我地见价钱OK拿拿林就叫咗个「鸡肉烤卷」食住先。由于即叫即做，鸡肉都几热辣辣！见到老板（应该系挂）好用心咁摆好所有材料喺卷皮度，我不禁谂起某啲连锁食店做嘢是是旦旦，又货不对版，啲料得个面有。相反，燃味栈用料好足，成个烤卷食到最底都有鸡肉！十分抵赞。我地叫咗芥末沙律酱，好搭！唯一美中不足系鸡肉喺酱料嘅衬托下冇乜味，当然，亦可以讲系比较健康嘅。总括而言，好值得试下（仲有得加芝士添）！荃湾嘅朋友，又或者去开荃湾嘅朋友，有兴趣嘅经过就买个试下啦！小本经营实在不容易，老板好好，整完份烤卷同我地讲咗句：「希望你地钟意」，大概呢种就系小店独有嘅人情味。