阿里郎熱狗棒 (已結業)

其实都系去到先知，原来呢档嘢嘅店员系讲韩文嘅，即刻感觉唔同晒，专业。用心。尽在此刻，咪就系呢啲啰。当然呢啲嘢都系门面担当，系咪真材实料就梗系要试试佢啦。话说我都系突然口痕心瘾起先揾佢出嚟食，至于点解系心瘾？因为细个九龙塘火车站有档有日本炸热狗卖，我成日食，因而有少少情意结。不过韩国嘢我就一向都麻麻，所以都系得个「试」字，唔系话好大期望。我叫咗有车打芝士𠮶一款，食物系即叫即炸，咬落都几香口，芝士亦几浓味，面包烟烟韧韧，同埋我好记得细个食啲炸热狗成日会有阵竹签味，我好唔钟意，呢只就唔会喇，正呀，而且想味道再丰富啲，枱面仲有唔同酱可以拣添，不过个人就觉得就咁落茄汁都好够喇～世事总系无完美，有赞嘅嘢当然都有弹嘅。第一，以呢个价钱嚟讲食小食都算贵贵地，佢个Size亦绝对唔系可以轻食当一餐嘅size；第二，个面包同条肠仔其实有啲脱离，如果可以包得更紧就好喇。总括而言，系咪好味到想不停翻焯呢？未必会～不过口瘾又到嘅话，都会谂系佢嘅。