Sodam Chicken (已結業)

星星已经做完好耐，估唔到炸鸡啤酒依然咁兴，韩国过江龙一间又一间嚟香港开分店。今次呢间话喺韩国有多间分店，所有腌料炸浆由韩国运到香港。餐厅可以坐六七十人左右，分开餐厅同酒吧区，餐厅区装咗部LCD不停播放K-pop。餐厅有炸鸡同焗鸡选择，炸鸡虽然香口啲，但每次食完都有内疚感，今次就叫咗脆脆焗鸡。焗鸡用上一只鸡份量，有一对上脾下脾鸡翼鸡胸。鸡块大小适中，嫩滑有肉地，鸡骨唔多。鸡块表面有面包糠，食落卜卜声同炸鸡冇分别，面包糠带有麦香。咬落鸡入面冇乜油份，绝对适合想食炸鸡又怕肥人士。除咗炸鸡焗鸡之外，餐厅仲有其他韩式食品供应。鱼串汤锅除咗有韩式鱼片外，仲有少量猪肉片同配菜金菇京葱旺菜豆腐辣椒，清清地与炸鸡焗鸡同食冇咁热气。泡菜辣汤煮年糕同鱼串汤锅近似，系多咗红萝卜年糕同韩式辣酱，年糕口感烟韧唔会太硬。以上两个菜都用小锅上，下面有gas炉加热保持温度。食炸鸡焗鸡梗系要叫番杯嘢饮，菊花蜜特饮用上阔口杯再加大大朵太阳花好抢眼，饮落就好似有气菊花茶。热饮金桔绿茶酸酸甜甜有好多金桔丝喺底食热气嘢啱哂。