樂香園咖啡室 (已結業)

系我唔o岩, 本应已经谂好唔去试重开既乐香园咖啡室.讲真, 若非对蛇窦有廿多年感情, 实在冇乜兴趣俾意见而家呢班用"乐香园"呢个名run紧既人. 唔理佢地当中有几多人系旧铺过o黎, 打正旗号吃老本, 客人就期望有老店既水准.蛇窦之所以系蛇窦, 冷气系重要既一环, 经纪陈如我入到店内, 清凉舒适, 茶香酥皮香面包香扑鼻, 坐低饮杯奶茶食件杂批, 等蛇王抖擞精神, 再战中环.如今冷气不足, 奶茶味淡, 茶走又炼奶唔够, 最失望系D杂批居然只系摆响玻璃柜: 杂批系酥皮, 馅料油份又高, 俾客食既时候唔热既话, 咁个批皮会唔香, 批馅会入口肥腻, 唔好食o架㖞大佬... 真系有D怀念以前个摆堂食面包饼点o既电热柜. 至o个碗"清水"公仔面, 救命, 真系唔好提, 反正旧店好似都冇好食过...老店重开, 出品有迹可循, 新人做唔翻, 故然令食客失望, 但旧老板既然其实仲系度, 经纪陈仲有希望, 除非佢从来冇用心, 根本唔知自己以前点解会成功. 我明白餐厅食品招乎全人手操作, 经营管理难度好高.我谂我开始要逼自己接受习惯o左既好事物系注定有一日会失去o既, 有美好回忆, 人生已经系无憾.