夢の丼 (已結業)

冇得去日本，唯有食日本餐止止痒。呢间听闻咗好耐，第一次食，最惊为天人就系佢啲丼饭𩠌多过饭，花锦鱼生丼比我想像中有诚意好多，一般日本餐厅嘅杂锦只会比cheap嘢，呢间竟然有三文鱼子，有蟹肉，成本价好高㖞，我哋钟意食三文鱼，二重亲子丼有生有熟，份量都几大，最好share嚟食，太饱会食唔到其他嘢。我亦都好欣赏呢度嘅小食，试咗个蟹膏豆腐，喺出面好难食到呢种口感同味道嘅食物，感觉新鲜，如果嫌海胆太贵，我觉得呢个蟹膏豆腐都会比到你有食海胆嘅感觉。如果平时食开帆立贝刺身，矶烧帆立贝都系一个新鲜嘅选择，另外叫咗啲刺身分别系深海池鱼同埋伊佐木，都非常新鲜，建议大家到时问一下侍应当日供应，确保可以食到全场最新鲜嘅刺身。左口鱼边寿司超好食，味道同个口感好惊喜，唔系一般刺身寿司嘅口感，钟意食浓味嘢嘅人会钟意嘅。小贴士，记得要订位，今日系星期四，晚上7点座无虚席，呢个人流绝对反映到呢度食物嘅水准。见到啲下午套餐都只系$98 ，有机会真系要过嚟试吓！