群記牛肉圓豬手

营业中

休息中

一有时间就会揸车过粉岭食群记猪手米，真系好好味，食极都唔厌！今日特登十一点半就黎到，唔使等位，不过都差唔多坐满，因为如果到左lunch Time就会好多人，呢度系唔会派飞仔等位，系自己企入去等位，所以一多人就会食得好大压力，要食到好快，要快啲让个位俾人咁。同埋系冇冷气嘅，热天食系会食到流晒汗！不过真系太好味，流晒汗咁食都值得嘅！啲粉面系有分大细嘅，我地叫咗2个大猪手米，牛肉炸卷同埋细净牛肉圆。猪手米个汤系青到不得了，好青香！好好饮！唔知系咪用啲猪手煲成，但系一啲都唔肥完全冇油腻嘅感觉。啲猪手好爽好香！猪皮好脆口好爽，食细碗嘅话真系唔够喉呀！而最重要系个辣椒油，简直系神来之笔，我本身唔系非常之食得辣，佢个辣椒油唔系好辣，系小辣再加蒜蓉香，加落去米粉同猪手度真系好夹好好食！正到我次次都可以成碟辣椒油食晒呀！肉丸都好好味，细细粒，非常弹牙！而炸卷我就觉得冇乜特别，不过系好新鲜即炸嘅，所以外面的腐皮系超脆，而入面的牛肉感觉好粗，点醋食，都几好味。呢个成日都好快卖晒，应该系有限量供应。最后加支支装忌廉，就Perfect 喇！