樂香園咖啡室 (已結業)

蛇窦嘅滑蛋碟头饭系列真系食极都唔厌！特别系滑蛋虾仁饭，啲虾仁非常大只，虽然估计都系雪藏货，但系质素非常好，爽口鲜甜！其实，有煮开𩠌嘅朋友都会知道，其实靓嘅雪藏虾可以比新鲜虾更爽口！滑蛋炒得刚刚好，食到炒蛋本身嘅质感之余，又保留到部分蛋汁。呢啲系中式嘅炒滑蛋，唔似西式要加牛奶加忌廉嚟扮滑，不过，唔排除可能加左一啲生粉水，同样做到中式嘅滑滑嘅效果！但就唔会好似以前啲滑蛋牛肉饭咁样，生粉水多个蛋，炒出来似蛋花芡多啲！此外，葱花对于我来讲，越多越好，够晒香！仲有，佢有自己制作嘅豉油，应该都系老抽底加啲生抽，唔算太特别，但系加入埋佢嘅辣椒油，又好似产生左啲化学作用，好配合，用时下饮食节目最行货嘅讲法，就系：哗！加咗秘制豉油同辣椒油，将整碟饭嘅味道提升哂！其实，我觉得啲辣椒油系香多个辣，所以好好味！如果你系食肉兽，可以另加煎火腿、煎午餐肉、煎香肠、煎孖肠都仲得！至于滑蛋饭系列嘅其他配搭，仲有牛肉同叉烧。最后，记得，唔食葱嘅一定要嗌走葱，因为葱花系碟饭本身有嘅！