影片
更多
2017-11-13
80 浏览
日本人钟意讲「食欲の秋」，因为秋天系农作物丰收季节，系好多食物当造嘅季节，加上秋高气爽，可以舒舒服服咁慢慢叹，的确令人食欲大振，呢个季节食Omakase(师傅发办)都好啱，因为师傅会因季节而选用适当食材去料理。今次揾到嘅餐厅位于天后琉璃街，喺维园东边出口行3分钟左右就到。门面好有日式风格，最特别系头顶有几只装饰用嘅木窗框。而木门亦系闩埋咗嘅，只有经木门上细细长长嘅玻璃窗窥探里面，感觉非常神秘，好似去咗高级会所咁。餐厅既然提供Omakase就一定会有日式料理枱前嘅座位，亦都有卡位、普通座位，普通座位之间有日式卷帘，增加私密感。钟意睇住师傅喺你面前整嘢食嘅就坐喺料理枱前，想自成一角就坐卡位或者普通座位。啱啱坐底，店员随即奉上热茶，热茶扮演好重要嘅角色，每食一样食物之间要饮返两啖，清清口中余味，咁样先食到真正味道~因为想食多啲款式食物，我地两个人叫左一个【鮨豊special set】$800/人同一个【Omakase寿司course】$880/人，大家开心share~【鮨豊special set】前菜系【杂锦渍物】，有牛蒡、萝卜片等，酸酸甜甜，刺激食欲，亦顺便清清口腔余味。主菜系一盘上，好精
今次揾到嘅餐厅位于天后琉璃街，喺维园东边出口行3分钟左右就到。门面好有日式风格，最特别系头顶有几只装饰用嘅木窗框。而木门亦系闩埋咗嘅，只有经木门上细细长长嘅玻璃窗窥探里面，感觉非常神秘，好似去咗高级会所咁。
餐厅既然提供Omakase就一定会有日式料理枱前嘅座位，亦都有卡位、普通座位，普通座位之间有日式卷帘，增加私密感。钟意睇住师傅喺你面前整嘢食嘅就坐喺料理枱前，想自成一角就坐卡位或者普通座位。
啱啱坐底，店员随即奉上热茶，热茶扮演好重要嘅角色，每食一样食物之间要饮返两啖，清清口中余味，咁样先食到真正味道~因为想食多啲款式食物，我地两个人叫左一个【鮨豊special set】$800/人同一个【Omakase寿司course】$880/人，大家开心share~
【鮨豊special set】
前菜系【杂锦渍物】，有牛蒡、萝卜片等，酸酸甜甜，刺激食欲，亦顺便清清口腔余味。
主菜系一盘上，好精美，即系丧影相。条鲤鱼好似想嚟睇食咁!
【黑鲔寿司3款(赤身、中拖罗、大拖罗)】
最肥美嘅大拖罗，系用火炙处理过，入口即刻爆油，满口油香，再配合火炙后恰到好处嘅少少焦味，味道令人留下深刻印象。
中拖罗就冇经过火炙处理，见到面头的油脂分布已经可以想像到摆咗入口之后系咩感觉，果然系非常Juicy。而赤身就系鱼侧同背嘅位置，自然冇乜油脂，但鱼味就相对会出啲~
【乌鱼子海胆虾丸】虾丸上面系乌鱼子，经干燥处理后有咀嚼感，味道有少少似咸蛋黄。虾丸外层有小小脆口，带有一丝丝虾肉，之后就系甘甜又弹牙嘅虾胶，「核心嘅内围」就系海胆浆。口感都味道都有几个层次，非常唔错。
牡丹虾 上面有海葡萄，海绿色细细粒，好靓，不过食落系冇乜味架。牡丹虾胶质重，虾味浓郁，好似食紧一粒虾味拖肥糖咁。
【海鲜丼3款(海胆、三文鱼子、黑鲔鱼腩蓉)】各自用3个玻璃酒杯装住，配合餐厅嘅射灯，影出嚟好亮丽，感觉好似3位佳丽参加选美咁。
「最上镜小姐」由三文鱼子佳丽夺得，每粒三文鱼子都晶莹剔透，好似一粒粒琉璃珠咁。
「最有内涵奖」就系黑鲔鱼腩蓉佳丽，因为黑鲔鱼腩蓉加咗啲芝麻、香葱去提升自己味道，外表唔系咁靓但食落非常之有味道。
冠军我就颁咗俾海胆佳丽，获奖原因? 冇架，我钟意食海胆啰~ 当然海胆鲜味得嚟份量又够多都系一个重要原因啦，咁多海胆捞落啲饭度特别好味。
【Omakase寿司course】
冷盘有【果茄、冰菜、𩽾𩾌鱼肝】
店员建议要先食果茄，然后到冰菜，最后就𩽾𩾌鱼肝，咁先食到真正味道~
冰菜系近年新兴食物，面头有一层冰珠，但又唔会溶，好似生长喺冰山上面咁，但成片摆入口，就感觉有少少脆嫩，但又唔驶特别去咀嚼已经软化咁，口感非常奇特，食落又凉浸浸。
之前喺其他餐厅食过用𩽾𩾌鱼汤做汤底嘅拉面，鱼鲜味浓郁，睇杂志介绍过，营养价值非常之高。𩽾𩾌鱼肝就第一次食，佢有「海底鹅肝」之美誉，都系珍贵食材，食落口感味道都真系有啲相似，非常绵滑入口慢慢融化。
【寿司10件】每件寿司都好新鲜肥美，果然系「食欲の秋」嘅出品。有金目鲷、花竹虾、赤贝(上)
𫚕鱼、深海池鱼、拖罗(下)
玉子、剥皮鱼、喜之次、北海道海胆、秋刀鱼︰
当中花竹虾本身够鲜爽，食落仲有黑松露味道，但打开里面又唔见有平时黑漆漆嘅黑松露，原本想问吓店员，长吓知识，但挂住食又唔记得咗。秋天系秋刀鱼当造季节，鱼肉甘香浓郁之余亦有一层皮下脂肪，够肥美。
而𫚕鱼就系咁多件寿司中食落最鲜甜，肉质亦好嫩滑。
寿司拼盘当中有一件系玉子，店员话入面混有鱼胶同虾胶，不过我食落无论味道同口感都只系似甜甜嘅蛋糕，嗒真的系有轻微虾味，但真系唔够「出」。
手卷系黑鲔鱼腩蓉，细卷咗少少，有芝麻提味，记得要趁紫菜仲系脆𠮶阵食~
【鮨豊special set】同【Omakase寿司course】都配埋汤同埋甜品。
汤系鲷鱼汤，里面有滑滑鱼肉、香菜、新鲜香菇，味鲜而浓郁，细细碗已feel到系精华所在。个碗盖系咪好靓呢? 店员话系老板喺日本订返嚟架，系日本师傅用金箔手绘，价值不菲架。摸落仲好有凹凸感!
甜品系【静冈蜜瓜+自家制奶冻】一摆上台我地嘅心情变化系---->。
来自日本嘅蜜瓜，听已经feel到甜，仲要系静冈蜜瓜，日本皇室御用架! 蜜瓜非常juicy，支叉拮落去软腍嘅蜜瓜肉，啲蜜瓜水已经渗出嚟，食落果肉绵密细致，极致嘅甜蜜，真系好想食又唔舍得食。
果冻系红豆抹茶奶冻，红豆喺面头，抹茶就喺杯底，记得要食到干干净净~
呢餐真系大满足，食材质量高，摆盘精美，一路食一路有惊喜。服务亦都相当好，我地一路食一路问，店员都有礼又亲切咁答，手脚亦好俐落。由味道到服务都深深体会到日本饮食文化。
张贴
